121.
cela son grand coeur, & comme il se sçauoit tresbien commander quand il vouloit. Et à la verité, lors vaincu par soymesme, ne fit moins, & n'acquist moins de gloire, que d'auoir obtenu vne grande victoire contre ses ennemis: car premierement il se vainquit soymesme, puis non seulement fit part de ceste belle dame à ce gentil ouurier, mais aussi luy ceda, quant au desir & affection, sans auoir esgard à l'amour qu'il portoit à ceste fauorite : qui tombant des mains d'vn si grand Roy, venoit entre les mains d'vn peintre. Aussi disent aucuns, que sur le patron de ceste tant belle creature, il fit depuis vne excellente peinture d'vne Venus Anadyomene, c'est à dire, procreée & sortant de l'escume de la mer. On trouuera cecy escrit par Pline, & beaucoup d'autres belles choses, tant dudit Apelles, que d'autres peintres fort excellens. Les victoires qu'eut Lucius Scipion en Asie (dont il fut surnommé Asiatique ) furent mises & figurees en beaux tableaux, pour seruir de memoires à la posterité. Lampridius nous apprent que l'Empereur Alexander Seuerus auoit la peinture de Virgile, & celle de Ciceron, entre autres: & les tenoit au lieu mesme où ses dieux domestiques estoient gardez.
Ie mettray sin à ce chapitre, apres auoir respondu à quelques mal-plaisans, qui disent que nous serions bien trompez, si beaucoup d'images & representations de plusieurs Romains, mesmes en nos medalles, estoyent faites à volonté, & non au vif, apres lesdits personnages. A ceux-cy Pline respond pour moy, disant, qu'encore qu'il fust ainsi, si est ce que cela ne peut prouenir que d'amour de la vertu, lors qu'on desire d'auoir les images & effigies des gens vertueux: de sorte que les vrais visages & portraits, qui n'ont esté delaissez & ne se trouuent point, sont grandement desirables, ainsi qu'il appert en Homere. Par lesquels mots il donne à entendre que les anciens ont quelquefois feint & faict à plaisir les images & representations d'aucuns illustres personnages. Nous aduise aussi qu'Asinius Pollio n'ayant trouué la vraye effigie & portrait du poëte Grec Homere, l'auoit fait faire à discretion, pour la mettre en sa bibliotheque & librairie. Et toutefois on monstre certaines medalles à l'inscription & nom dudit poëte. Mesmement Aristote escrit au second liure de sa Rhetorique (aussi fait Iulius Pollux en son deuxieme liure) que les habitans de l'isle deChios (auiourdhuy Cio) mettoyent en quelques monnoyes le visage & vray portrait d'Homere leur citoyen. Ciceron en son Oraison qu'il fit pour le poëte Archias, escrit le mesme des habitans de Smyrna, ville
