THEODORA Iustiniani Imperatoris vxor, foemina illustris & prudens. Cùm Iustinianus extremis temporibus parum esset mentis compos, multò maximam administrationis partem ad se traxit. Vigilium Pontificem in carcerem coniecit, & panem illi & aquam solùm aliquot diebus dedit. Nobilissimum templum apostolorum excitauit, multò magnificentius & ornatius illo, quod à Constantino extructum fuerat. Ex humanis autem excessit, cùm annos XXI . menses III . in Imperio peregisset.
    IVSTINVS minor, nepos Iustiniani ex filia, à teneris annis non vt nepos, sed vt filius in regia semper habitus, & à Iustiniano Imperator coronatus. Natura ad omnia dexter, magnanimus, pius in Iustiniani domum & familiam, & ab initio principatus, ductu Sophiae coniugis, liberalis fuit, vnde sibi animos militum & ciuium deuinctos reddidit. Sed posteà tantae deditus auaritiae, vt Senatores spoliaret, & in omnes passim diuites rabie quadam desaeuiret. Fidei etiam Christianae contemptor maximus, in Pelagianam decidit haeresin. Foedus Persicum, quo Romani quotannis Persis pendebant libras auri quingentas, dissoluit, illísque bellum indixit. Cúmq; Persae ad deuastandas terras Romanas cum magnis copiis irruissent, & cum ingenti praeda inoffensè abiissent, tantam ex accepta clade accepit tristitiam & moerorem, vt ratione amissa, amens fieret, ac decimotertio Imperii anno diem extremum pedum dolore, clauderet, superstite vxore Sophia, & declarato Tyberio Imperatore.
   In hoc Numismate adparet Imperator in sella sedens, dextra globum, sinistra sceptrum tenens, pedibus verò rostrum nauis premens, inscriptione addita eiusmodi: VOTA XXX. MVLTA XXXIX . Et infrà subiectum: CONOB .
F Vxorem