empreint d'vn costé, & de l'autre costé y a ceste inscription, Restitutor mon. (id est monetoe ) c'est à dire, Restituteur de la monnoye. Iceluy desirant soulager le peuple, qui auoit esté par les precedens Empereurs fort foulé & surchargé de grands tributs & tailles, fit forger de petites pieces d'or, propres au peuple pour payer petit

tribut, comme estoit tout son desir. Et fit diuiser son Aureus, qui pesoit deux drachmes, en trois sortes de pieces d'or, qui furent dictes Semisses, Tremisses, & Quartarij. Semisses valoyent la moitié dudit Aureus, & ne pesoyent qu'vne drachme d'or pour piece. Tremisses ou Trientes valoyent le tiers d'Aureus (dont furent ainsi nommez) & ne pesoyent que deux scrupules ou treseaux, chacun. Quartarij valoyent le quart dudit Aureus (dont aussi furent nommez) & ne pesoyent qu'vn scrupule & demi, qui est demie drachme la piece. Mais il fut contraint, pour la pauureté du fisque & les necessitez publiques qui furent de son temps, de ne mettre point en auant les derniers, qui sont dits Quartarij: ains luy fust force de les supprimer & faire fondre, pource qu'il ne peut venir iusques là, que le peuple ne payast pour tribut & taille ordinaire qu'vn Quartarius. Et demeurerent les Tremisses, & eurent cours entre le peuple pour payement dudit tribut, rauallé & reuenu à la valeur d'vn de cesdits Tremisses: laquelle valeur (selon la computation dont auons par cy deuant vsé, estant l'or estimé en proportion decuple ou dixieme à l'argenr, & le denier Romain eualué trois sols six deniers tournois) pouuoit monter à vingttrois sols quatre deniers tournois. Que si l'or s'estime en proportion douzieme à l'argent, faut eualuer ledit Aureus à raison d'autant que douze surpassent dix, & ses parties à leur endroit de mesme. De laquelle proportion de l'or à l'argẽt, nous en dirons autant que peut seruir à la matiere que traitons presentement. Or suyuant ceux qui estiment le denier d'argent Romain quatre sols tournois, comme fait Robert Cenalis, l'Aureus & ses parties vaudroyent plus: à sçauoir, l'Aureus qui fut du temps de Seuerus Alexander, pesant deux drachmes, reuiendroit à quatre liures quatre sols tournois, monnoye Françoise: le Semis ou demi Aureus pesant vne drachme, à deux liures deux sols tournois: le Tremissis, à vingthuit sols tournois: le Quartarius, à vingt & vn sols tournois. Mais l'Aureus sextulaire (dont six faisoyent l'once) qui couroit fort du temps de Iustinianus l'Empereur, pouuoit reuenir à la valeur de cinquante six sols tournois: le Semis, à vingthuit sols tournois: le Tremissis, à dixhuit sols huit tournois: le Quartarius, à quatorze sols tournois. Ledit Cenalis