France, à sçauoir, sept sols tournois pour teste: car chacun Iuif en payoit autant par an aux Romains. Par ainsi si le Stater estoit suffisant pour payer le tribut d'eux deux, il s'ensuit qu'il valoit quatre drachmes, ou bien quatre deniers Romains, à fin que nous ne soyons contentieux & rigoureux pour si peu de difference qu'il y a entre les deux. Retournant à nostre Aureus Romain, fait à l'imitation

du Stater d'or, Grec, ie dy qu'en diuers temps il a esté fait de diuerse pesanteur. Car il pesoit autant que deux deniers Romains legitimes, du commencement qu'il fut fait, à sçauoir, la Republique Romaine estant gouuernee par Consuls: & se frappoit à la marque du denier d'argent, c'est à dire, auoit d'vn costé quelque teste de leurs dieux, de leurs Rois, Ianus à deux visages, ou bien la teste de Rome armee: & au reuers, quelques chariots, biges ou quadriges, comme au denier d'argent: ou bien vne proüe de nauire, ou quelque autre telle chose. Cest Aureus Consulaire du poids dict, se trouue encore pour le iourdhuy: & d'autres aussi du poids de deux drachmes, qui est moins: & encore de moindres, à sçauoir, du poids de quatre scrupules, que les Orfeures appellẽt deniers ou treseaux. Voyla comme cest Aureus se trouue de trois sortes. Mais il a demeuré bien long temps du premier poids, c'est à dire, pesant deux deniers Romains legitimes: voire du temps des premiers Cesars & Empereurs. Toutefois depuis petit à petit il diminua de poids, de sorte que sous l'Empereur Seuerus Alexander il n'estoit plus que du poids de deux drachmes, & se nommoit Solidus, comme l'appelle Lampridius en la vie dudit Empereur. Or fut-il encore apres retranché derechef de telle sorte que de deux on en fit trois, & par ainsi ils ne peserent plus chacun que quatre scrupules ou treseaux, où auparauant ils en pesoyent six. I'appelle tousiours treseau ce que les Orfeures François disent deniers. Ainsi supposé que la drachme est de trois treseaux, en quatre drachmes y a douze trezeaux: lesquels partis en trois, font quatre treseaux pour chacune piece. Cest Aureus pesant quatre scrupules ou treseaux, se disoit Sextulaire, à raison qu'il faisoit la sixieme partie de l'once: & en falloit six pour faire l'once. Et fut nõmé Solidus, aussi bien que celuy qui fut forgé par Seuerus Alexander, du poids de deux drachmes.

Voicy la raison de ce nom Solidus. Seuerus Alexander quelque ieune qu'il fust, estoit bon Empereur: & entr'autres actes siens, fut grand reformateur de la monnoye, comme il appert, tant par ce que ie diray, que aussi par vne medalle de cuiure que i'ay, bien rare, & depuis n'agueres trouuee en Lorraine, laquelle a son visage