APRES auoir sommairement parlé de la matiere des medalles & mõnoyes, des lieux & officines où elles se faisoyent, & de ceux qui en auoyent la charge, il faut maintenant discourir sur l'intention & fin qu'ont pretendu les Romains, faisans forger tant de medalles, desquelles encore pour le iourdhuy se trouue si grand nombre, non seulement à Rome & par toute l'Italie, mais aussi par toutes les prouinces qui leur ont esté sujettes. Nous ne parlerõs point icy de la mõnoye coursable en ce temps là, le proffit, vtilité, & commodité de laquelle, voire la necessité leur suadoit d'en faire battre continuellemẽt, cõme les autres nations, ainsi qu'auons touché cy deuant. Seulement est icy question d'entendre, s'ils ont eu esgard à la seule gloire & reputation, faisant forger tant de medalles (que nous appellons proprement medalles à la difference des monnoyes) & pensé par tel moyen eterniser leurs noms & faicts, par memoire durable, ou pour le moins bien lointaine: ou si telles medalles pareillement leur seruoyent aussi de monnoyes, ayans vn prix certain & arresté. C'est le debat qui est entre Enea Vico & Sebastiano Erizzo, antiquaires, desquels auons parlé. Erizzo soustient que les medalles, mesmement imperiales, ne furent iamais faites pour auoir cours & lieu entre les mõnoyes. Enea Vico dit, que si, & qu'elles estoyent de mise, & coursables comme les autres monnoyes: outre l'espoir qu'auoyent les autheurs d'icelles, de perpetuer leur glorieuse renommee, par ce qu'elles paruiendroyent comme de main en main à la posterité. A raison dequoy ils furent soigneux d'y faire empraindre & engrauer comme petits symboles & marques de leurs beaux faicts & actions principales, auec briefues inscriptions & appositions de leurs noms, grandeurs & dignitez. Lesdicts antiquaires ont beaucoup d'argumens d'vne part & d'autre, pour maintenir leur opinion: & les peut-on voir en leurs escrits, qui sont fort longs & prolixes.


   Or pour plus claire intelligence de cecy, en premier lieu nous constituons deux sortes de medalles, à sçauoir, medalles Consulaires (si medalles les faut dire) & medalles Imperiales. Consulaires nous appellons, iusques au tẽps de Iulius Cesar & d'Augustus, qui changerent l'estat Romain, auparauant gouuerné par Consuls annuels enuiron l'espace de cinq cens ans apres les Rois chassez. Medalles Imperiales disons estre, celles qui depuis furent frappees par les Cesars & Empereurs Romains. Cecy supposé, faut aussi noter
D.j.