hors mis les bords, le reste est de cuiure: comme ainsi soit qu'il s'en trouue aussi d'autres, lesquelles au contraire sont de la susdite matiere, les bords exceptez, qui sont de cuiure pur seulement. Et pour

ce sommes venus à parler de l'airain Corinthien, tant estimé par les Romains, n'est à obmettre ce qu'en escrit Pline, à sçauoir, que fortuitement il fut fait au sac de Corinthe, quand elle fut prise par Mummius le Romain, & mise à feu, tous metaux se fondirẽt pesle mesle par l'ardeur de ce grãd feu: & de ceste confusion & meslange de metaux, vint cest airain ou bronze Corinthien, si requis &

desiré, voire des plus grãds, à Rome. Quãt au fer, par les loix deLycurgus il seruit de pecune aux Lacedemoniens, estant preferé à l'or & à l'argent, ainsi qu'escrit Plutarque. Voire à fin qu'on n'en abusast aucunement, on l'empiroit & le rendoit-on inutile, en le fondant ou trempant auec beau vinaigre. Au semblable, il seruit de monnoye aux Bysantins, habitãs de la ville où est auiourdhuy bastie Constantinople. Veritablement si nous voulons auoir esgard à l'vtilité & aux commoditez qu'apporte vn metal, nous trouuerons le fer estre à preferer à tous metaux, soit or, argent ou autre, principalement pour sa dureté: à raison de laquelle sont faites armes offensiues, defensiues, instrumens de toutes sortes, à tailler, couper & rompre: somme, toutes choses que nous voulons estre de longue duree. Mais feray fin, ne parlant dauantage de l'or (qui est le troisieme de nos metaux) apres auoir adiousté ce petit mot,

que l'or ne seroit si cher, ne tant estimé comme il est, si ce gentil artisice de faire le verre ductile & maniable à volonté, veu au temps de Tibere, duroit encore. Caril se trouua lors vn personnage, qui deuant ledit Empereur cassa vn verre, & puis soudain de ses mains le refeit & restitua: chose qui luy despleut grandement, & pour co le fit mourir, disant que si le verre ductile venoit en vsage, l'or decherroit de prix, & n'en tiendroit-on plus de conte. Le mesme personnage (dit Dion) auoit retenu à belles cordes, sans aucun bois ne autre matiere, le Portique ou pourmenoir de Liuia, fort bel edifice, prest à tomber: pour laquelle inuention tant industrieuse, il auoit desia auparauant esté chassé de Rome par le commandement dudit Tibere.