365.

de sauuer sa vie, les pria d'vne chose, qu'ils luy permissent vestir ses habillemens, & prendre sa lyre pour chanter par maniere de consolation, vne derniere plainte de sa triste fortune & malheureuse fin. Il prist enuie à ces cruelles gens de l'oüir encore chanter vne fois, & pourtant obtint aisément sa requeste. Ainsi doncques soudain reuestu & troussé comme il souloit estre, estant tout debout sur le tillac, commença à haute voix à chanter vne chanson & modulation musicale, que l'on appelle Carmen orthium. Son chant paracheué, tout ainsi qu'il estoit vestu & accompagné de sa lyre, se ietta franchement du haut en bas dedans la mer. Or penserent ces nautonniers, que sans doute il seroit bien tost noyé, & pource passerent outre & continuerent leur nauigation. Mais il aduint vn cas estrange & merueilleux, & de grande pieté, benignité & faueur: car il n'eut pas si tost sauté en la mer, que voicy vn Dauphin qui se trouua entre ses bras & dessous luy, & chargé sur son dos & eleué sur l'eau le mena & porta sain & sauf de corps & habillemens au promontoire de la region Laconique, qui est nommé Taenarus, auiourdhuy Le cap Metapan: d'où Arion vn peu de temps apres partit & se rendit à Corinthe. Où paruenu, se presenta au Roy Periander au mesme habit & estat qu'il fut porté sur le Dauphin, & luy compta toute son auanture. ce que le Roy ne creut aisément, mais le fit serrer & mettre en prison comme vn menteur, & iusques à ce que les mariniers arriuez à Corinthe, furent interroguez finement en l'absence d'Arion. Illeur demanda s'ils auoyent point ouy parler au lieu d'où ils venoyent, d'Arion le ioüeur de harpe. Ils respondirent qu'ils l'auoyent laissé en Italie à leur partement, qu'il se portoit bien, qu'il triomphoit és villes de par delà, delectant tout le monde auec sa musique, & pource il estoit le bien-venu par tout & amassoit grandes richesses. Sur lesquels propos voicy arriuer Arion auec son instrument musical, & les mesmes habillemens auec lesquels il s'estoit ietté en la mer. Qui rendit fort estonnez les nautonniers, lesquels conuaincus ne peurent nier la verité du faict. Et pourtant (adioustent quelques-vns) furent aigrement punis par le commandement de Periander. Ceux de l'isle Methelin & ceux de Corinthe racomptoyent ordinairement ce compte, en tesmoignage de quoy se voyoyent encore au Promontoire & Cap de Metapan deux simulachres de bronze, vn Dauphin portant, & vn homme porté.
   Or que le Dauphin soit tant amoureux & tant familier de l'homme, iusques à le porter sur son dos en la mer, sera aisé à entendre à