344.

pour le passé & pour l'aduenir. I'ay leu en l'histoire des Indes d'vn Portugais, nommé Antoine Teurreyro, qui partit de Balsera ville sur l'Euphrate (où estoit anciennement la grande Babylone des Chaldees, ainsi que veulẽt aucuns) deliberé de passer ce grand desert d'Arabie, & d'aller iusqu'en Damas, ville principale de Syrie. Luy & sa guide montez sur deux Chameaux, firent ce voyage en vingt & deux iours, ayans porté viures pour eux, auec quelque peu d'orge & eau pour leurs bestes, lesquelles ils n'abbreuuerent point que le dixieme iour seulement: qui est chose estrange, qu'vn si gros animal se passe de boire si longuement. Et qui est icy non moins admirable, l'Autheur de ceste histoire escrit, qu'en ce voyage ledit Antoine & son compagnon se guidoyent, non par aucun chemin faict qu'il y eust en ces deserts, mais par le vẽt qui leur seruoit comme de bussole ou calamite. Car ils ont en cet endroit des pilotes sur terre, ainsi que ceux qui nauigent sur la mer: toutesfois differents en ce que ces pilotes de terre (si ainsi les faut nommer) se gouuernét par le Soleil & par l'obseruation des vents qui courent & varient par ces deserts. Cecy soit dit en passant. I'adiousteray aux conditions du Chameau, recitees cy dessus de Pline, que cet animal, encore masle qu'il soit, pisse par derriere & entre ses deux iambes de derriere, tout ainsi que faict le Lyon: qui est contraire aux cheuaux & autres animaux masculins, qui pissent en deuant. Ie n'oublieray aussi ce qu'escrit Gregorius Nazianzenus, à sçauoir, que le Chameau n'a pas faute de memoire, quand il se souuient d'vn outrage qu'on luy aura fait, soit qu'il ait eu bastonnades, soit qu'on l'aιt autrement offensé. Iules Scaliger & autres, font plusieurs especes de Chameaux. Entre lesquels ceux qui sont nommez Dromadaires, du mot Grec δρόμος, qui est à dire, Cours, courent grandement & font grande diligence: encore que les autres n'allans que le pas, auancent beaucoup en leurs passees. Il est escrit que Selim, Empereur des Turcs, vsoit de ces Dromadaires en lieu de cheuaux de poste, & par leur moyen auoit nouuelles de fort lointains païs en peu de iours.
7.

    LE septieme portrait est tiré du reuers d'vne medalle d'argent de Philippus l'Empereur, sous lequel (comme a esté dit) furent celebrez les jeux seculaires & monstrez au peuple animaux estranges de duierses contrees, comme cestuy qui est icy figuré, que plusieurs estiment estre Hyena, beste feroce, de laquelle espece esdits jeux seculaires en fut produit iusqu'au nombre de dix, ainsi que raconte