Thessalie, habitans prés le mont Pelion, lesquels ont esté les premiers qui ont dompté le c'neual & cõbattu de dessus: qui fut cause que leurs voisins les voyans ainsi, cuiderent que c'estoyent partie hommes, partie cheuaux, cõme si ce n'eust esté qu'vn de l'homme & du cheual. Autant en ont pensé les Indois, premieremẽt trouuez & descouuerts en la region du Peru par le Capitaine François Pizarre & autres Espagnols, en vne bataille qui fut donnee entre eux & le Roy Artabalipa, accompagné de plus de cent mille Indois: dedans lesquels le premier qui donna brusquement fut le Capitaine Hernan de Soto Maiore, monté sur vn cheual d'Espagne, & les escarta comme perdereaux, estans desia estonnez d'vn coup de mosquet qui auoit esté tiré en leur esquadron, lequel coup ils cuidoyent estre venu du ciel comme vn esclat de tonnerre. Ainsi ces pauures Indois pensoyent l'homme Espagnol & le cheual n'estre

qu'vn, comme il est raconté en l'histoire des Indes. De l'origine des Centaures, la fable est feinte par les Poëtes en ceste sorte: Ixion admis par Iupiter à la table des dieux, deuint amoureux de Iunon, & la pria d'amourettes: de quoy elle aduertit son mari Iupiter, lequel luy supposa vne nuee conformee à la semblance de Iunon, de laquelle il engendra les Centaures, qui depuis estans priez aux nopces de Pirithoüs, pleins de vin & enyurez voulurent rauir & emmener l'espousee: mais Theseus & les Lapithes en tuerent vne partie, & mirent l'autre en fuite.
4.

    LA quatrieme figure est d'vn cheual Neptunian ou cheual marin, comme il est demonstré par l'inscription, Neptuno conseruatori Augusti, c'est à dire, A Neptune conseruateur d'Auguste, à sçauoir, Gallienus, du quel est la medalle. Il se voit plusieurs medalles Consulaires, és reuers desquelles Neptunus dιeu de la mer, est tiré par cheuaux marins semblables à cestuy-cy.
5.

    LE cinquieme portrait est semblablement tiré du reuers d'vne medalle de cuiure du sus-nommé Empereur Gallienus, de laquelle l'inscription est, LIBERO. P. CONS. AVG. qui est, Libero Patri Conseruatori Augusti, c'est à dire, A Bacchus conseruateur d'Auguste. Par Liber Pater est entendu le dieu Bacchus fils de Iupiter & Semele: soit qu'il ait esté nommé Liber, libre, franc & dieu de liberté, pource que le vin (duquel on le fit inuenteur) rend les personnes libres à parler, & les deliure de toute seruitude d'esprit, de tout soin & cure: ou bien pour plusieurs autres raisons alleguees par Varron,