Democratiques gouuernees en commun ou populairement. Les luitteurs,& ceux aussi qui couroyẽt és Stades & courses publiques, se tiroiẽt par sortition:cõme aussi il se faisoit quand les soldats partageoyent quelque butin. Ces mesmes gens de guerre quelquefois par sorts tirez alloyent à quelques grandes & perilleuses entreprises. Brief,les anciens ont vsé de sorts & fortuites elections en plusieurs & diuerses choses: & entre autres(qu'on pourroit trouuer estrange) à choisir femmes,quelquefois qu'ils se sont voulus marier: de quoy est tesmoin Suetone en la vie de Tibere Cesar. Mais,& en cecy & autrement , plusieurs fois les sorts ont aidé à tromper les gens , & ont beaucoup serui à tromperies & fallaces , à erreur , à gain & pro ffit illegitime,à curiosité & superstition. Et de ce est aduenu que les jeux de sorts pour la plus part ont esté defendus,comme jeux de dez & semblables.Non toutesfois que ie ne sçache bien que le sort ou sortition , eloignee des vices susdits , soit quelquefois permise aux Chrestiens, lors que la raison & conseil humain n'ont point de lieu, & és choses que l'on n'entend pas tant remettre au hazard & fortune , qu'à la bonne & sainte volonté du grand Dieu qui gouuerne tout par sa prouidẽce & dispose de tout:au iugemẽt duquel lors nous appellons , & remettons à luy tout l'euenement de tel sort : suyuant ce qui est dit par Salomon , chap.16. des Prouerbes , On iette le sort au giron, mais tout son iugement est de par le Seigneur. Ainsi en ont vsé les A postres en l'election de Matthias, qui par sort fut faict successeur de Iudas. Ainsi à Zacharie estoit escheu le sort de faire encensemens au temple, S. Luc chap.1. On ne condamne point les sorts iettez,lors que par iceux Ionas est cogneu & declaré fuyant la presence du Seigneur,Ionas chap.1. Par le benefice des sorts Samuël declare Saül Roy, 1. Samuel chap.10. Au contraire, plusieurs autres ne peuuent estre bons selon Dieu : comme

sont les sorts Geomantiques,qui se prennent de la terre : Onomantiques , qui se prennent des noms propres : Arithmantiques, des nombres des lettres : Tephramantiques , de la cendre ou poudre où sont inscriptes quelques lettres: Botanomantiques, de fueilles de quelque herbe , comme saulge ou autres plantes , esquelles sont inscriptes quelques questions & puis exposees au vent; Ceremantiques, de cire liquefiee & fondue tombant en l'eau , & faisant en icelle diuerses figures : Stichomantiques , des vers de quelque poëte, comme Virgile, desquels les Empereurs Adrian , Alexandre Seuere & autres , ont souuentesfois vsé. Ceux-cy furent appellez Sorts Virgilians. Encore pires furent les sorts Prenestins, Antiatins
c.j.