271.

De là en auant on ne voyoit autre chose parles rues & deuant les maisons , qu'Androdus menant son Lyon en lesse auec vne petite cordelette,& luy donnoit-on de l'argent,& iettoit-on des fleurs sur le Lyon,disant, Voicy le Lyon l'hoste de l'homme, Voicy l'homme le chirurgien du Lyon. Voyla ce qu'Appion l'historien escrit,non apres l'auoir entendu d'aucun áutre, ne l'auoir leu , mais pour l'auoir veu de ses propres yeux , estant à Rome de cas d'auenture quand cela aduint.
   Et pource que nous sommes sur le propos de ces pauures gens condamnez aux bestes , il me souuient de ce qui est escrit par Trebellius Pollio,de ce folastre Empereur Gallienus.Le conte est ridicule & tel : Vn Lapidaire auoit vn iour vendu à l'Imperatrice sa femme quelques pierreries,pour vrayes & legitimes, qui toutefois estoyent faulses & non legitimes,ains de verre & rien moins que precieuses. De quoy elle fut fort courroucee, & se plaignant d'auoir esté trompee , pria l'Empereur son mari de luy faire raison de ce trompeur. Ce qu'il luy accorda. Et comme il eust commandé qu'on empoignast ce galant,& qu'on le liurast aux bestes , il ordõna secrettement que quand ce viendroit sur le poinct de le liurer, qu'en son lieu on iettast vn chappon ausdictes bestes. Ce qui fut faict,& quant & quant hautement prononcé par le Crieur public, que tout ainsi qu'il auoit trompé vendant sa marchandise , il auoit esté semblablement trompé,en ce que cuidant pour certain mourir de cruelle mort, il ne mouroit pas. Ceste tromperie luy fust grandement vtile : & n'aduient pas à tous pauures malheureux condamnez à la mort,d'estre ainsi trompez.
   L'Empereur Seuere Alexandre , trop plus sage & aduisé que Gallienus,fit le contraire en la personne de Vetronius Turinus,qui abusoit de sa faueur & familiarité , au detriment & dommage de plusieurs. Car il se disoit auoir grand credit enuers Alexander : & quand quelqu'vn le requeroit de le prier de quelque chose en sa faueur , il feignoit la response de l'Empereur , disant qu'il luy auoit ainsi & ainsi dit & respondu : & toutesfois il n'estoit rien de tout cela. De sorte qu'il vendoit bien cher telles fumees & vaines parolles, & en faisoit ordinairement coustume: qui meut l'Empereur à le punir, non par fiction & de peur seulemẽt (comme Gallienus) mais realement & de faict , le condamnant à mourir par fumee de bois à demi allumé. Et de faict, il fut attaché à vn posteau en plein marché , & là suffoqué à la fumee d'vn feu faict de paille & & bois mouillé : disant l'Empereur (par la voix du Crieur public)