eust grandement desiré de mourir si somptueusement, que l'on peust dire apres sa mort que nul n'estoit mort auec telle magnificence & somptuosité, ne si richement.
7.

   LA septieme medalle de ceste planche est d'vn meilleur Empereur

que le precedent, encore qu'il luy fust cousin germain, à sçauoir, de Seuerus Alexander, duquel on peut dire, qu'il ne fut inferieur à ses deuanciers Empereurs, ny en bonté ny en douceur & clemence. Sur tout il ne fut point sanguinaire, ayant souuent en la bouche ce mot Euãgelique, Ne fay à autruy ce que tu ne voudrois t'estre fait. Laquelle sentence il auoit apprise des Chrestiẽs, & tant l'aimoit qu'il la faisoit escrire tout par tout, voire & la prononcer à haute voix par vn crieur public ou trompette, quand on punissoit vn delinquant. Il aima les Chrestiens, les endurant & ne permettant qu'il leur fust faict aucun desplaisir. Et voulut faire, dit Lampridιus, vn temple à CHRIST, & le receuoir entre les dieux: & le tenoit auec Abraham, Orphee, & autres bonnes ames, au lieu de sa maison où il souloit le matin prier & faire ses oraisons, que nous auons dit cy deuant estre nommé des Latins Lararium. Il osta aussi aux cabaretiers & tauerniers vn lieu où ils souloyent plaider & debattre leurs querelles & procez, & l'adiugea & donna aux Chrestiens: alleguant qu'il estoit beaucoup meilleur qu'en toutes sortes Dieu y fust honoré & serui, que d'estre occupé par telle maniere de gens. De ce est aduenu qu'aucuns ont voulu dire, qu'apres l'Empereur Adrian cestuy a esté le premier Chrestien des Princes Romains. Toutesfois il ne semble pas auoir esté bien informé de la verité Chrestienne, quand il vouloit faire mettre au rang des dieux, CHRIST vray Dieu, & de qui seul depend le salut de tous hommes. Au demeurant, comme son premier nom fut Alexius, il print le nom d'Alexander, pource qu'il auoit esté nay en vn temple dedié à Alexandre le Grand, lequel sur tout il aima, & le voulut imiter & resembler, desirant estre veu tel que luy en ses vestemens, & en ses monnoyes, & autrement: mesmement il fit forger medalles tant d'or que d'autres matieres (comme nous auons dit au 2. & 9. chapitres de ce traicté) au portrait & figure dudit Alexandre le Grand, ainsi que tesmoigne le susdιt historien Lampridius: lequel semblablement monstre en quelle maniere & comment il restitua & meliora les mõnoyes Romaines, dont il est appelé en vne mienne medalle de cuiure, Restituteur de la monnoye, comme i ay desia touché audit chapitre 9. Reste l'expedition & guerre qu'il dressa
a.ij.