254.

en sa chambre. Voyla la fin miserable du plus miserable homme de son temps, encore qu'il fust vn des beaux hommes de son tẽps, & nay de parens fort nobles & honorables autãt qu'Empereur qui fust deuant luy. Regna treize ans seulement.
   Le reuers de ceste mienne medalle d'argent a ceste inscription, IVNONI SISPITAE. Qui nous verifie & confirme ce qu'a escrit Festus, à sçauoir, que les anciens ont vsé de ce mot Sispita pour Sospita, quant à l'appellation de la deesse Iunon, qui par les habitans de la ville dite Lanuuium (qui luy dresserent vn temple) fut nommee Sospita, c'est à dire, conseruatrice & preseruante de danger: telle fut la folie de ces pauures gens abusez. Suyuant laquelle inscription ladite Iunon est empreinte en ce reuers, presque de la mesme façon que vous la verrez figuree en la premiere medalle de la table marquee L, où nous declarerons plus amplement son habit assez estrange, & le demeurant.
5.

   CE cinquieme portrait est du mesme Empereur Commodus, que i'ay icy apposé pour monstrer la difference que l'aage apportetant aux personnes qu'aux medalles. Vous voyez Commodus beaucoup plus vieil en ceste medalle qu'en la precedente, où il se monstre tout ieune. Et ne faut trouuer estrange, si souuent vous voyez plusieurs medalles d'vn mesme personnage ne se ressembler quant au visage. Ce que vous obseruez aisément és medalles de Cesar Octauian Auguste, ieune & vieil, apperceuans vne grande difference d'vn visage à l'autre. Cecy suffise pour exemple. L'inscription qui est icy se lit en ceste sorte, Commodus Antoninus Pius Felix Augustus. Commodus se nomme Antoninus Pius, du nom de son grand pere, qui fut autant bon Empereur, que luy mechant. Il est aussi le premier des Empereurs qui se nomme Felix, c'est à dire, heureux. Lequel tiltre ont vsurpé puis apres, presque tous les autres Empereurs suiuans, mesmement les plus modernes.
6.

   LA sixieme medalle de ceste planche est du plus deplorable Empereur & abandonné à toutes voluptez qui ait esté. I'ay mis son portrait icy, à fin que ceux qui sont amateurs de medalles le puissent aisément distinguer des autres Empereurs nommez comme luy, Antonius. Car il se trouue assez de medalles qui ont pareille inscription à ceste-cy (comme d'Antoninus Bassianus Caracalla, & autres) qui ne sont de luy. Qui s'arresteroit doncques à l'inscription seule & à ce nom seul Antoninus, on y seroit