206.

ie n'auois enuie d'en interposer aucune icy: toutesfois la chose estãt ainsi aduenue, que ie n'ay peu estre present à la taille de toutes les tables de ce premier liure, estant la demeurance du sculpteur bien esloignee de moy, s'est faite vne meslange de telles medalles, outre l'ordre non gardé, à mon grand regret. Ie vous asseure,encore qu'il eust esté mal-aisé d'vser d'vne bonne ordonnance & suite en medalles tant diuerses & differentes, qui sont icy proposees en partie comme pour exemples & pour plus claire exposition du traicté precedent: que si i'eusse voulu seulement mettre en auant des medalles Consulaires, ou seulement des medalles Imperiales: (ce que desia ont fait aucuns deuant moy) Ie pouuoy garder ordre selon le temps des Consuls, ou bien des Empereurs. Ou si i'eusse traicté quelqu'autre matiere particuliere, laquelle i'eusse voulu prouuer & confirmer par ostension de medalles antiques, ie l'eusse peu faire auec meilleur order: mais i'ay voulu simplement vous faire present de quelques miennes medalles, tirees de mon cabinet: desquelles la plus part n'ont esté declarees par cy deuant, ou l'ont esté autrement, & les autres sont plus rares & non veuës ny entendues de beaucoup de gens. Le mesme soit dit des portraicts des pierres grauees, mises à part incontinent apres les medalles:esquelles encore moins d'ordre se pouuoit garder, pour leur varieté & difference. Tant y a que vous y verrez & entendrez de belles choses, si ie ne me trompe, tant aux vnes qu'aux autres. Ie parle à ceux qui n'ont pas eu le moyen de lire beaucoup de liures Grecs ou Latins, mesmement touchant l'histoire Romaine, qui seront possible ioyeux de voir icy ce qu'ils n'õt point apprins ailleurs. Car ce mien labeur ne s'adresse, & n'est point faict pour gens sçauans, desquels ce que nous escriuõs n'est point ignoré ny incogneu. Vous excuserez donc, s'il vous plaist, le tout, singulierement quant à l'ordre non gardé, comme i'eusse bien voulu: faisans proffit de la declaration des graueures & medalles suyuantes, qui vous pourra seruir cy apres à entendre toutes autres medalles, qui tomberont entre vos mains.
1

   LE premier portrait de ceste premiere table marquee A,est d'Alexandre le Grand, retiré d'vne mienne medalle d'or, fort belle, qui est vn didrachme, pesant deux drachmes Attiques, & plus. Car il pese deux treseaux & dixhuit grains: autrement deux escus sol & demi, & enuiron cinq grains de surplus: comme aussi fait vn autre didrachme d'or du Roy Philippe, que i'ay. I'ay veu autres Alexandres,