186.
iouir toute sa vie. Et ne voulut imiter Sylla: car il voulut bien estre Dictateur perpetuel, non semestre, ny autrement limité à certain temps. Il receut la Dictature perpetuelle, à luy offerte par le Senat Romain : & ne fut honteux d'apposer à ses medalles & monnoyes ce tiltre de Dictateur perpetuel,comme appert encore en celles qui ont ceste inscription,
Caesar Dictator perpetuò.
Quant au corps,il fut beau personnage,grand & robuste au trauail,exercé à toutes armes tant à pied qu'à cheual, hardi & vaillant sur tous. Il estoit chauue, & pource portoit volontiers la couronne de laurier, pour cacher la nudité du deuant & partie anterieure de sa teste. Ce qui se peut voir & obseruer encore en ses medalles,esquelles ladicte couronne de laurier est fort auancee sur le deuant. Pour le faire court, apres auoir vaincu ce grand Pompee, & triomphé de tous ses ennemis: ayans conspiré & iuré sa mort plus de soixãte Senateurs Romains, desquels les principaux estoyent Cassius, Marcus Brutus, & Decimus Brutus,entré au lieu où estoit assemblé le Senat,fut assailli par Cimber Tullius & Casca, & autres coniurateurs, qui l'assasinerent & tuerent,luy donnans vingt & trois coups de poignard: desquels vous verrez la figure & façon en la planche & table marquee H, nombre 3. Ainsi mourut l'an 56.de son aage, & de son regne & tyrannie vsurpee,le 3. Et fust mort auec trop plus grande renommee s'il eust voulu se monstrer aussi grand defenseur de la liberté, comme il en fut oppresseur.
187.
AVGVSTVS.
LE
second Cesar, est Caius Cesar Octauianus, fils d'Octauius & Actia, laquelle estoit fille d'Actius Balbus & de Iulia,soeur du susdit Caius Iulius Cesar: dont appert qu'il estoit petit neueu audit Iulius, duquel aussi consequemment il fut adopté pour fils, & par son testament fait heritier & de son nom, & de la meilleure part de son bien : & de là fut tousiours nommé., Caius Cesar. Et pource qu'il estoit de la gent & famille des Octauies, adiousta à ses tiltres l'appellation d'Octauianus. De rechef apres par le Senat luy fut donné le nom d'Augustus. Donc cestuy Caius Iulius Cesar Octauianus Augustus eut en soy beaucoup de bonnes & louables choses,mesmement en sa vieillesse: car de sa ieunesse & commencement il fut assez turbulent, voire grandement à blasmer, de ceste cruelle proscription, mise sus & executee tant par luy que ses deux complices Marc Antoine & Lepide, durant leur Triumuirat. Quelques vns escriuent que pour luy fut remise en auant la loy Royale, nommee
Lex Regia,
faite du temps