ment marquez, qu'il n'y auoit pas vne d'icelles Muses qui ne tint son enseigne,à quoy on les cognoist coustumierement.Mais qu'est il aduenu de nostre memoire? N'a pas long temps qu'il fut monstré à Paris à monseigneur le Duc de Lorraine, vn rubis non graué, ayant empreinte naturellement la face d'vn Empereur couronné, fort bien representee, ainsi que plusieurs veirent en la compagnie dudit seigneur. Ceste Achate,& ce Rubis auoyent telles figures de nature. Ie parle maintenant des pierres grauees : comme fut celle, dont ordinairement cacheta toute sa vie le fils de ce barbare Espagnol, lequel Scipion l'Africain mineur tua,estant par luy prouoqué au combat,non loin d'Itercatia ville de la Celtiberie. Là le fils auoit fait grauer & exprimer ce duel memorable de son pere auec Scipion. Dequoy se mocquant Stilo Preconinus, Qu'eust-il donc fait (disoit-il) si au cõtraire de ce qui aduint, son pere eust tué Scipion? Ptolomee Roy d'Egypte donna à Lucullus vne fort belle & riche esmeraude garnie d'or, en laquelle son image estoit grauee. Pompee le grand cachetoit ses lettres auec vn anneau, en la pierre duquel estoit graué vn Lyon tenant vne espee. Suetone escrit,que du temps de l'Empereur Tibere c'estoit chose capitale & qui se punissoit par mort,auoir porté mõnoye ou anneau, où l'effigie du Prince

fust, aux latrines,ou au bordeau. Ce que monstre par exemple particulier Seneque,disant, qu'aduint vn iour qu'vn nommé Paulus, homme illustre, ayant esté autrefois Preteur, estoit en vn banquet ayant en son doigt vn anneau, en la pierre duquel estoit empreinte la face de Tibere Cesar. Il print vn pot pour pisser dedans: ce que fut lors noté par vn Macro bon espion & rapporteur de ce temps-là. Or assistoit là vn seruiteur dudit Paulus auquel on tendoit ces filets,qui tira l'anneau du doigt à sondit maistre enyuré. Et à l'heure mesme Macro appelle en tesmoins tous les assistans,pour testifier puis apres que Paulus auoit mis l'image du Prince en lieu deshonneste. Ce que desia confessoit Paulus, quand le seruiteur monstra ledit anneau en son propre doigt. Du regne de l'Empereur Claudius,quatrieme des Cesars,les seruiteurs affranchis d'iceluy, donnoyent permission d'entrer au lieu où il estoit,par anneaux d'or,dedans lesquels sa face estoit grauee, de sorte que c'estoit le signal de tel credit & priuilege : comme dit Pline, qui d'abondant adiouste,que de son temps on commençoit à porter Harpocratés, & autres Dieux Egyptiens,és doigts,c'est à dire, en anneaux. Nero l'Empereur, successeur dudit Claudius, eut vn anneau, dont luy auoit fait present Sporus (lequel le mechãt auoit espousé pour femme)
R.j.