quand ils venoyent à mourir, faisants certaines cerimonies, par lesquelles ils estoyẽt receus au nombre des Dieux immortels. Or pour monstrer la deification, la cité estoit toute meslée de pleurs & de lamentations, accoustumées d'estre faictes aux funerailles des Empereurs, pource que le corps de l'Empereur mort estoit enterré auec vne grand pompe,selon la coustume des autres hommes. Apres ils faisoyent vne imaige de

cire à la semblance du mort, laquelle ils mettoyent dedans vn grand lict de parement faict dỷuoire,esleué en haut à l'entrée du palais imperial, couuert & enrichi de couuertures dỏr, ou l'imaige du mort estoit couchée, qui resembloit à vn malade decoulouré & pasle. De l'un des costez du lict, & à senestre estoyent assis tous les Senateurs de Rome, qui demeuroyẽt là vne grand partie du iour auecques leurs robes de dueil. Du costé droit estoyent assises toutes les Dames selon l'estat & dignité de leurs maris, ou de leurs peres. Et ne s'en trouuoit pas vne accoustrée de doreures, ny parée de carquants, ou de cheines: mais estoyent vestues de robes blanches, legeres, à la semblance de personnes tristes & dolentes. Et duroyent ces cerimonies sept iours sans plus: durant lesquels les medecins entroyent tous les iours, s‘approchants du lict, faignants de taster le poux au malade, et faisants iugemẽt qu'il aloit tousiours de pis en pis. Et quand ils disoyent que le patient auoit rendu l'ame, les plus nobles de l'ordre des Cheualiers, &

les plus apparens des Senateurs prenants le lict sur les espaules, le portoyent par la rue sacrée iusques au marché vieux, ou les magistrats de Rome auoyent accoustumé de se demettre de leurs offices. De tous les deux costez il y auoit des degrez à la semblance d'un schalier,