Ie n'auoye pas deliberé d'escrire du colosse de Rhodes, qui estoit la statue d'Apollo, pource que i'en auoye faict mention au liure second de mes Antiquitez de Rome. Tant y a que sommairement i'en diray ce que i'en ay tiré dύn liure Grec fort ancien, toutefois acephale, qu'autrefois me presta feu Messire George de Vauzeles, Cheualier de Rhodes, Cõmãdeur de la Torrette, & qu'il auoit autresfois apporté de Grece, mon voisin & singulier amy, et duquel ie n'ay voulu taire le plaisir qu'il me feit, pour auoir esté en son viuant homme liberal de ce qu'il auoit, à l'endroit de tous ses amys. Et dudict liure i'en tiray au plus pres ce qui śensuit.


   Entre les autres miracles estoit le colosse de Rhodes, faict de bronze, dressé en l'honneur du Soleil de septante coudées de hauteur, faict par Colasses, qui consuma douze ans en tel ouurage. La base, qui soustenoit la statue, estoit de forme triangulaire, & chascune de ses extremitez estoit soustenue par soixante colonnes de mar bre. Et par le dedans estoyent degrez, faicts à la semblance d'vne vis, par lesquels lon montoit iusques au plus hault de la machine: à la sommité de laquelle estoyent bons & variables instruments d'vn chant suaue & tresdoulce musique. Le chanter & la symphonie estoit de vers Iambiques. Et dudict colosse estoyẽt veuës toutes les parties de la Syrie, & les nauires qui aloyẽt en Aegipte, par le moyen dύn grand miroir, qui estoit pendu au col de la statue, qui auoit le visaige tourné droit à l'Egipte. La statue se monstroit droitte, & qui tenoit à la main dextre vne espée, & de l'autre vne longue

picque. Lon estimoit que la despense auoit passé trois cents talents d'or. Il tomba la cinquantiéme année apres qu'il fut faict & dressé, par vn tremblement de