65.

    Aureum Imperatorum ordinem, omnium quos continet orbis pulcherrimum habet LEOPOLDVS, Princeps Florentinus.
    Longis Numismatum ordinibus eminet BARBERINORVM Cardinalium Bibliotheca: Illos VRBANVS Papa VIII. magna cura, magnis sumptibus in vnum coëgerat.
    Archiepiscopi Bononiensis BVONCOMPAGNO Numismata quantum habent nominis, ignorat nemo qui haec amat.
    Insculptas gemmas pereximias & omnis generis Numismata plurima habet Nobilißima RONDANINA Romana, Inscriptionum inuestigandarum omnisque Antiquitatis peritißima, quam aliis etiam nominibus Incomparabilem Heroïnam vocauit Vir inter doctos magni nominis IO. IAC. CHIFLETIVS, Eques & Regis Catholici Archiater, eorumdem studiorum aemulus.
    FRANCISCVS GOTTIFREDVS, Nobilis, & Patria sua dignus Romanus, iis fruitur quibus nemo, ne Princeps quidem, sicque fruitur vt melius animo haec quam armario complectatur, adeo diligenter tenet: has illi res virtus, nobilitas, liberalitasque peperere; quas nec minus doctus amare & optare, nec minus sumptuosus comparare potuit, nec minus Illustris eo splendore retinere & conseruare.
    BRACCESIVS Abbas, illius popularis eodem studio tenetur: huic mirum quantum fama tribuit, quantum nominis pollicetur.
    Quam Horum sit peritus LEONARDVS AGOSTINI satis docet Bibliothecae Vaticanae fama, Antiquitatum omni genere refertißimae, cui a Pontifice Maximo AEdituus est datus.
    Nobilißimi ROZINI Veneti cumulatißimus Antiquitatum omnium Thesaurus Venetiis ab heredibus etiamnum seruatur.
    Neque has omisit delicias grauißimis alioqui negotiis distentus SCHINKELIVS DE VALCOVR, Gandauus; his insuper insculptas gemmas adiunxit & Nobilium artificum imagines aere incisas.
    NICOLAVS HEINSIVS , Belgij Foederati ad Suecos Orator, doctus DANIELIS filius, immensam scientiam his autoritatibus confirmat & perficit.
    GRONOVIVS Leydensis in Historia Professor, huius instrumentis vix minus abundat, quam illius scientia, in qua non modo suos Ciues, sed & totum Orbem demeruit.
    Infinitae paternaeque doctrinae heres VOSSIVS, harum etiam rerum scientia, clarus, eas permultas & egregias sibi comparauit. Haec vtilia ornamenta quoad potuerunt in suum Orbem ex vltimis terris elicuerunt Optimates Angli. Sed infinitum esset omnes recensere.

66.
Nunc de Autoribus Rei Antiquariae superest vt agamus.

    NVMISMATA omnis generis in vnum coëgit HVBERTVS GOLTZIVS, & ita digeßit, vt nihil melius. Scripsit de Imperatoribus, ad C. Caligulae tempora: atque de Graecis vrbibus & Regibus, quae exstabant Numismata, contraxit, quae doctissime L. NONNIVS est interpretatus. Quod vero rem nostram propius attingit, Fastos Magistratuum & Triumphorum Romanorum magna cum laude persequutus est.