EVROPA Agenoris Phoenicum regis filia fuit, quam Iuppiter fingitur in formam bouis rapuisse, ac per mare in Cretam transue xisse: ex qua treis genuerit liberos, Minoem, Rhada manthum, Sarpedonem. Vide Diodo. Sicu. li. 5. Ouid. lib. 2. Metamor. circa finem. Interpretatur fabulam Palephatus de Cretensi quodam, cui nomen erat Taurus, qui Europam captiuam abduxerit.
   Ab hac Europa, fertur tertia orbis pars denominata, quanquam non assentiat Herodotus, qui neminem compertum habe re dicat, vnde id tertiae orbis parti nomen datum. Vide Herodotum lib. 4.
    MINOS , Iouis Asterij & Europae filius, anno à creatione mundi 2710. ante Christum natum 1252. classem comparauit, mare obtinuit, & insularum Cycladũ dominus primus, in earum plerisq; colonias posuit, Caribus eiectis, filiósq; suos con stituit principes: latrones è mari sustulit. Thucyd in praefatione historiae suę. Hic omnium consensu habitus est vir iustus, & probatae vitae, tradunt persuasisse primùm scriptis vti legibus, finxisse autem eas Mercurij datas praecepto, autore Ioue. Diodor. Sicul. lib. 2. & 6. De huius Sapientia. Vide Diony. Halica. lib. 2. in gestis Numae. Volater. lib. 33. sic ait: Minos certè ob summam iustitiam, post mortem iudex apud inferos dictus est, vnà cum Rhadamantho fratre.
    ANDROGEVS , Minoïs filius, praeclarae indolis adolescens, ab Atheniensibus, quòd in athletica superasset, occiditur: íd que causa belli extitit. Volater. lib. 33.