202
par est, ita et variae vnius papyri laminae inter se discrepant; qua de re, propter diuersas laminae ¬
cuiusdam et horizontales, et verticales fibras, inter varia papyri fragmenta inuenta nonnisi
duo inter se coniungi possunt, quippe quo loco eadem est in vtroque fragmento fibrarum aut
altitudo, aut crassitudo, aut perspicuitas, aut alia earum ratio similis. Quum dubites adhuc de
loco iuncturae ; literae fractae, aut versuum series vtraque papyri in parte conspicuae, momentum
faciunt. Nuspiam enim accidit, vt, quum duo fragmenta papyracea fibris conueniant certo in
margine, ibidem etiam literae variae diuisae ac fractae in vnum corpus redeant, si fragmenta illa
perperam coniuncta fuerint secundum fibras. Quod accidere potest, quum inter duo fragmenta
aliud quoddam desideratur. Denique foliorum, quibus papyri constant, et ipsius voluminis cuiusdam ¬
longitudo cognoscitur e iuncturis papyri atque e versuum vel columnarum scriptarum longitudine. ¬
Scilicet quoduis volumen papyraceum constat foliis singulis longitudine paribus, quae quidem ¬
folia ita inter se iunguntur, vt alterum alteri inglutinetur; quibus in locis, vel iuncturis,
papyri crassiores sunt et lumen non transmittunt. Quum vero quoduis papyri cuiusdam folium
suam habeat laminarum et fibrarum texturam singularem: facile ex cuiusque fragmenti natura
cognoscitur, ad quodnam papyri folium spectet. Etiam columnae scripturae, in papyro quauis
conspicuae, pares sunt longitudine; quam ob causam, cognita vnius columnae longitudine, reliquarum ¬
iam est certa. His quidem regulis obseruandis facillimum est, omnis generis papyros ex
fragmentis suis restituere, etiamsi partes quaedam amissae fuerint; atque hac ratione ortus est
nouus ille Zodiacus Aegyptiacus, cuius similitudinem ad autographi fidem redditam habes Tab. III
infra. Quum enim papyrum hocce e fragmentis suis, quatenus licuit, reparassem, vtriusque partis
titulos charta lucida, seu corticea, descripsi, quod meum exemplum accuratissime nunc in lapidem
lithographicum transscripsi 2). Ceterum hoc papyrum recte a me restitutum esse, vel hic facillime
intelligitur. Scilicet primum, fragmenta eius varia, quae lineis cincta atque cum characteribus
suis, tum in parte aduersa, tum auersa conspicuis, accurate Tab. III. infra descripta sunt, vtraque
in parte inter se congruunt. Notandum, perspicuitatis causa partem papyri nostri aduersam hic
ordine contrario descriptam esse in lapide. Hinc si vel vnum fragmentum alio loco poneres: eo
aut partis aduersae textus, nimirum quadrata illa astronomica; aut partis auersae inscriptio, nimirum ¬
versus hieroglyphici, soluerentur et turbarentur. Itaque singulis fragmentis cum quadratis
suis astronomicis eadem fragmenta cum literis suis hieroglyphicis subscripta respondent ambitu
suo et serie versuum. Nihil dicam de fibrarum in fragmentis iunctis congruentia, de qua prae
sente papyro iudicari potest. Porro ne hoc quidem recte se haberet, inter bina fragmenta longius
breuiusue, quam ego feci, spatium ponere. Nam data est tum trium foliorum longitudo, vt ex
juncturis ad No. 2, 9 et 15, lineolis parallelis significatis, cognoscitur, tum duarum columnarum
scriptarum longitudo, vt versuum extensio 21—11 et 10—4 docet. Ceterum claret, quadrata illa
astronomica quoque inter se conuenire. Nam 12 illa quadrata Partis IV. D. fragmento quidem
integro continentur, ex quibus reliqua diiudicanda sunt. Triplex est nimirum in papyro nostro
Zodiaci repetitio (D. E. F.). Iam quamuis dolendum sit, grauissimo hoc in papyro deesse particulas ¬
nonnullas; habemus tamen fere integrum monumentum astronomicum nouum. Nam integra
2) Quum monumenta Musei Taurinensis Aegyptiaca nondum omnia in iustum ordinem tum temporis redacta
fuerint, numerus huius papyri indicari nequit. Meae vero Bibliothecae Aegyptiacae collectae est MS. No. 9283.
