dix desdites pieces d'or : qui est plus de douze escus. Vous voyez que par les loix, l'enfant non encore paruenu à dix ans, estoit vendu trop plus que n'auroit esté prisé IESVS-CHRIST par les Iuifs , au compte susdit, à estimer ces trente pieces d'argent , trente

deniers Romains. Combien donc valoyent-elles dauantage? Henricus Vranius les fait valoir dix escus,à compter l'escu à trente cinq sols tournois piece , ainsi que fait Budee : c'est dixsept liures tournois & demie. Stanislaus Grserpsius Polonnois , les estime beaucoup plus que ledit Vranius : à sçauoir, non pas trente deniers Romains, mais trois cens deniers Romains, qui font trente sicles d'or. Car il dit que ces trente pieces d'argent se doiuent prendre pour la valeur de trente sicles d'or, à sçauoir,d'or qui est inferieur au pur & au plus fin. Ceste somme reduite au calcul de Budee,lequel il suit, monte à cinquante deux liures & demie , liures tournois. Voyla son opinion. Mais si en lieu du Sicle d'or, Hebrieu , on prenoit le Sicle d'argent, voire le Sicle du Sanctuaire , qui valoit deux Sicles vulgaires : la somme que met ledit Stanislaus raualleroit de beaucoup.

Car estant ainsi,que le Sicle d'argent du Sanctuaire, reduit à la monnoye Françoise, valoit quatorze sols tournois, les trente pieces dont est question ne monteroyent qu'à vingt & vne liure tournois. A quoy y a grande apparence : mesmement si nous voulons suyure Iosephe, lequel escrit Argyrous en plusieurs lieux,c'est à dire, pieces d'argent, & entend la valeur du Tetradrachmus , qui est de quatre drachmes ou deniers. Ioachimus Camerarius, homme tresdocte & bien versé és escrits des autheurs Grecs , prise ces trente pieces d'argent, dictes Argyria, trois cens escus. Et est celuy de tous (que i'ay leuz) qui les a mises plus haut & plus estimees : de sorte qu'à son dire le Seigneur & Sauueur du monde auroit esté vendu trois cens escus:lesquels, encore qu'ils ne valussent que trente cinq sols tournois piece, suyuãt la premiere estimation & prix de l'escu, monteroyent à cinq cens vingtcinq liures tournois. Ie ne sçay de quel autheur Grecil l'a apprins.
   Vous voyez la varieté des opinions de gens doctes,touchant ces trente pieces d'argent: & me plaist beaucoup l'opinion de ceux qui les eualuent vingt & vne liure tournois, desquels est Cenalis, & quelque autre sçauant personnage aux annotations qu'il a faites sur le 26. chapitre de S.Matthieu. Car il y a bien grande raison de suyure en cet endroit Iosephe, qui estoit Iuif, homme outre son sçauoir & eloquence , tresbien entendu & és monnoyes Hebraïques, & en tout ce qui concernoit la nation Iudaïque. Que si quelqu'vne