197.

d'appeller & choisir, & non acheter les gens de guerre: qui fut en partie cause de sa mort: car par la faction d'Otho son successeur, les gens de cheual le tuerent en la place publique, estant fort vieil, aagé de septante trois ans. Son regne fut court, à sçauoir, de sept mois seulement.

198.
OTHO SYLVIVS.

   CE huitieme Empereur fut aimé principalement de la gendarmerie, & n'eut rien de meilleur ne plus memorable en toute sa vie, que ce qu'il delibera plustost mourir que nourrir vne guerre ciuile entre ses concitoyens Romains. Qui fut cause qu'ayant entendu Vitellius remuer mesnage, voire estre esleu Empereur d'aucunes legions, il se donna vn coup de poignard au trauers du corps vn peu au dessous de la mammelle senestre, comme plus à plein recite Plutarque en la fin de sa vie, qu'il a laissé par escrit. Il ne vesquit que trente huit ans, & ne regna que nonante cinq iours pour le plus.

199.
AVLVS VITELLIVS.

    VITELLIVS neufieme Empereur, n'honora de rien plus le siege Imperial, que les six precedens ses deuanciers. Il les surpassa voirement, mais ce fut singulieremẽt en gourmandise, en laquelle il se porta tellement, que l'on peut dire auec verité, que tout son regne ne fut qu'vne bonne chere & yurongnerie continuee depuis le commencement iusques au bout. Il fut aussi cruel, & eut autres vices, pour lesquels hay, ne regna lõguement: & fut traitté fort ignominieusement à la fin, estant mené par la ville les mains liees derriere le dos, la corde au col, la pointe d'vn poignard sous le menton à fin d'estre mieux veu, la face estant haulsee, laquelle fut souille auec bouës & fanges, accompagné de toutes sortes d'iniures: & de là conduit au lieu où coustumierement l'on punissoit d'extreme supplice les mal-faicteurs, fut cruellement, par le menu, & non tout d'vn coup, massacré: puis auec vn crochet trainé & ietté dans le Tibre: ayant voscu 57. ans, & regné 8. mois seulement.

200.
VESPASIANVS.

    SOVS cestuy bon Prince, la pauure Republique Romaine commença vn peu à respirer, ayant esté merueilleusemẽt affligee depuis la mort d'Auguste Cesar, par tant de mauuais Empereurs. Il fut toutesfois auare, disant que tresbonne estoit l'odeut du gain de toute chose que ce fust: voire de l'vrine mesme il tiroit tribut & proffit. Il eut la charge, auant que