de medailles remarquees auec le chariot nommé Carpentum, & autres, où elles se voyent effigiees en deesses, Cerés, Iustitia, Salus. Ce qu'est assez manifesté en Liuia, qui fut femme d'Auguste Cesar. Voire qui pis est, on sacrifioit aussi à icelles Statues (tesmoin Dion) ie dy des Dames, comme de Drusilla la soeur de l'Empereur Caius Calιgula, & desdicts Empereurs aussi: & semblablement d'aucuns hommes priuez, comme Marius Gratidianus, Seianus, & autres. Et telles Statues quelquefois se mettoyent entre celles de leurs Dieux, cõme ledit Caius Caligula se fit mettre entre les deux freres Castor & Pollux, pour là estre adoré comme vn Dieu. Ce qu'il desira grandement, quand il fit apporter de la Grece les plus beaux simulachres des dieux, ausquels on ostoit les testes, pour y en appliquer vne faite à sa semblance. La Statue de Marc Antoine le Romain estoit en plusieurs maisons à Rome, entre les Dieux domestiques, dit Capitolinus. Quelle honte estoit-ce, que lon iuroit par la fortune des Empereurs, voire des Dames Liuia, Drusilla, & telles ordures? Et non seulement le peuple conferoit & contribuoìt argent pour faire telles Statues aux Empereurs, mais quelquefois aussi le Senat Romain. Cornelius Gallus administrãt l'Egypte sous Auguste (dit Dion) se faisoit eriger Statues par tout, engrauant ses faicts mesmes en pyramides. A Demetrius Phalereus les Atheniẽs pour ses merites dresserent trois cens soixante Statues, qui fut au temps que l'an n'estoit encore que de trois cens soixante iours. Pline le ieune, au deuxieme de ses epistres escrit, quelques vns (qui se nioyent estre Chrestiens, & le vouloyent monstrer par effet) auoir esté contraints par luy mesme de sacrιfier à l'image de l'Empereur Traian, & luy offrir encens & vin. Autant en dit Suetone, quand il escrit qu'on tuoit des bestes pour oblations ausdicts Empereurs, comme on faisoit aux dieux. Le mesme met Tertullien en son Apologetique. Et qui ne le fasoit, estoit sacrilege, & accusé comme criminel de lese maiesté.
Retournons maintenant à parler vn peu de la premiere espece de Statues, qui se nommoyent aux Romains
Sigilla,
& estoyent petites (plus ou moins) ne paruenans à la iuste mesure ou hauteur de l'homme. Et faut icy noter, qu'à Rome, le lieu ou la rue où se faisoyent telles petites images des Dieux estoit nommee
Sigillaria:
& si auoit aussi vne feste de ce mesme nom, celebree auec les festes Saturnales, ausquelles par l'espace de sept iours on ne faisoit aucun oeuure serieux: mais toutes choses de plaisir & resiouissance, comme lors lιcitement toute personne iouoit aux dez, & pouuoit faire
